Tumaas pa ng 24% ang bilang ng mga naitatalang bagong kaso ng COVID-19 sa bansa ngayong linggong ito.
Sa inilabas na National COVID-19 Case Bulletin ng Department of Health (DOH) nitong Lunes ng hapon, nabatid na mula Hulyo 25 hanggang 31, ay nakapagtala sila ng kabuuang 24,100 na bagong kaso ng COVID-19 sa bansa.
Anang DOH, average na bilang ng bagong kaso kada araw ngayong linggo ay nasa 3,443, na mas mataas ng 24% kung ikukumpara sa mga kasong naitala noong Hulyo 18 hanggang 24.
Ayon sa DOH, sa mga bagong kaso, 76 ang may malubha at kritikal na karamdaman.
Mayroon rin namang naitalang 44 na pumanaw ngunit wala sa mga ito ang naganap noong Hulyo 18 hanggang 31.
“Of the 44 deaths, 1 occurred in June 2022, 3 in January 2022, 2 in November 2021, 7 in October 2021, 20 in September 2021, and 11 in August 2021,” anang DOH.
Samantala, noong Hulyo 31, 2022 naman ay mayroon umanong 744 na malubha at kritikal na pasyente na naka-admit sa mga ospital dahil sa COVID-19.
Sa 2,583 ICU beds para sa mga pasyenteng may COVID-19, 601 (23.3%) ang okupado habang nasa 29.5% ng 22,051 non-ICU COVID-19 beds naman ang kasalukuyan ding ginagamit.
Iniulat rin naman ng DOH na mahigit na sa 71 milyong indibidwal o 91.81% ng target na populasyon ng pamahalaan ang bakunado na laban sa COVID-19.
Sa naturang bilang, 16.2 milyong indibidwal ang nakatanggap na ng kanilang booster shots.
Nasa 6.7 milyong senior citizens o 77.87% naman ng target A2 population ang nakatanggap na ng kanilang primary series.
Kaugnay nito, patuloy na pinapaalalalahan ng DOH ang lahat na huwag maging kampante sa banta ng COVID-19.
“Bagkus, dapat natin ipagpatuloy ang tamang pagsunod sa minimum public health standards sa ilalim ng Alert Level 1. Paalala ng Kagawaran ng Kalusugan na laging magsuot ng best-fitted face mask at kung maari, manatili sa well-ventilated na mga lugar. Sa oras na makaramdam ng sintomas, AGAD NA MAG-ISOLATE. Para sa karagdagang proteksyon laban sa banta ng COVID-19, agad-agaran na tayong magpabakuna at booster,” paalala pa ng DOH.
